الرئيسية / القناة / دانيال البرزى يكتب عن : التاريخ الديمجرافي لشعب الإسماعيلية الأصيل

دانيال البرزى يكتب عن : التاريخ الديمجرافي لشعب الإسماعيلية الأصيل

((العائلات والجاليات الأجنبية حينما كانت تعيش في الإسماعيلية وتسافر عن طريق محطات البولمان الى القاهرة وبورسعيد والى الاسكنتدرية لدرجة انهم نطقوا اللغة العربية بعد احتكاكهم مع اهل الإسماعيلية لأنها كانت مدينة
متنوعة بنكهة اوربية تجد فيها الفرنسي  والايطالى واليونانى والانجليزى))
الاسماعيلية مدينة مش قديمة النشأة .. مدينة من احدث المدن المصرية عمرها لا يتعدى ال140 عام .. نشأت مع افتتاح قناة السويس سنة 1869 الاسماعيلية ككلمة نسبة للخديوي اسماعيل .

من الطبيعي ان اهل اسماعيلية يبقي مصدرهم الرئيسي هجرات الناس اللى جت اسماعلية ايام حفر قناة السويس وفضلو فيها ومرجعوش بلدهم ودول يعتبرو سكان البلد الاصليين والناس اللى جت بعد حفر قناة السويس ولقو فيها مصدر رزق جديد القايم على بحيرة التمساح والقناة والناس اللى جت بردو بعد نهاية الحرب واستوطنو فيها يذكر ان الاسمعلاوية هاجرو ايام الحرب عشان مكانش ينفع يعيشو فى البلد وهى فى حالة حرب كانت معظم الهجرات للقاهرة والدلتا والمدن البعيدة عن الضرب .

الناس اللى عاشت ايام الاستنزاف فى اسماعdلية هما دول اللى حسو فعلا بمرارة الاحتلال مش تقولى ناس كانت جنب بيوتها طول الفترة دى وقاعدين جنب الراديو يسمعو الاخبار .

موقع اسماعلية جغرافيا اكيد كان اهم اسباب اختيار الناس لاسماعلية .. موقع اسماعلية يعتبر استيراتيجي فى منطقتها .. تقريبا مفترق الطرق فوق بورسعيد وتحت السويس .. يمينها سينا وشمالها القاهرة والدلتا يعنى اى حد من اى مكان من دول مضطر يعدي عليها وهو مسافر لحتة تانية بردو من دول اسماعلية مدينة ساحلية .. وفى نفس الوقت زراعية .. ودا صعب جدا تلاقيه فى اى محافظة فى مصر مدينة ساحلية بتطل على قناة السويس وبحيرة التمساح والبحيرات المرة مصايف وقرى سياحية وبلاجات فى اسماعلية وفايد .. صيد وملاحه وهيئة قناة السويس

فى نفس الوقت زراعة ومساحات خضرا .. واسماعلية مشهورة بالمانجه والفراولة وغيرها..و اكتر مدينة فى مصر مشهورة بالمساحات الخضرا والجناين.
اسماعلية يعنى الكورة .. والكل يعرف مين هو الاسماعيلي وكام لاعب فى المنتخب عدو ع الاسماعيلي او كان هو سبب شهرتهم اسماعلية يعنى الهدوء والجمال .. طرقها وشوراعها وكورنيشها
, اسماعلية كمساحة مش كبيرة .. وفى نفس الوقت مش زحمة لان اهلها متوزعين فيها .. مش متكدسين فى منطقة واحدة.

اسماعلية مدينة تاريخية عرابي والتل الكبيرة .. والطابية المشهورة النصب التذكارى دا نصب لذكرى الحرب والجندى المجهول ويشمل بانوراما لحرب أكتوبر
.. تبة الشجرة اللى كان فيه معسكرات الاسرائيليين ايام الحرب وادامه الساتر الترابي وخط بارليف اللى اتدمر وهناك فى اثار من الحرب وادوات كان بيستخدمها الاسرائيلين والخنادق والاسلحة بتاعتهم.
اسماعلية يعنى كورنيش محمد على .. وكورنيش نمرة 6 .. وكورنيش البلاجات… يعنى جنانين الملاحة وجناين الغابة وكل شريط اخضر تلاقيه فى اى طريق تمشي فيه فى اسماعلية.

اسماعلية ملتقي اللهجات من العرب (البدو) واللهجة البورسعيدي ولهجة الفلاحين ولهجة الصعايدة ولهجة السواحلية .. ولكن بلا لهجة. و كما يطلق عليها البعض _اسمعلللية بشد اللام_ ملهاش كلمات مميزة ممكن يقف عليها حد انها تمييز للاسماعلاوية..

لو اتكلمنا عن صفات مميزة فى شعب اسماعلية هتلاقي الطيبة .. وخفة الدم هتلاقي الدم الحامى .. المشاهر المتأججة (بتوصل احيانا للافورة) ويمكن دى صفة فى السواحلية عامة.

اسماعلية يعنى المهرجان السنوى والكرنفالات الشعبية. يعنى السمسمية والفن المميز اللى مش موجود الا بس فيها وفى مدن قليلة.
يعنى المحطة الجديدة وعرايشية العبيد للناس البسطا .. ودول اقدم منطقتين . الشيخ زايد وحى السلام للطبقة العادية .. ودول حديثي النشأة ..الافرنج للطبقة العليا شوية وكان حى الاجانب زمان ودى اول منطقة سكنية كانت فى اسماعلية.. فى المحطة الجديدة والعرايشية هتلاقي مجانين الاسماعيلي والناس اللى تحس معاها بطعم وريحة اسماعلية…
الشيخ زايد ودا الحى اللى انشأه الشيخ زايد ال نهيان الاماراتى كهدية للمصريين بعد الحرب وفيها كل العماير بنفس الشكل اللى هو الطوب الفرعونى ومساكن الحجر زى ما بيقولو ..وزيها بالظبط منطقة الخمسة والكاكولا والاعلام والجمعيات.. حى السلام ودا الحى الشعبي اللى فيها .. واللى معظم اهله اصلهم من الشرقاوية او الصعايدة .. واتطبعو بطبع الاسمعلاوية بسرعة اوى ودا احدث حى منشأ فى اسماعلية .. وبردو تحس فيه بروح اسماعلية… حى الافرنج ودا الحى الارقي .. ودا اللى كان بيسكنة الفرانساويين والانجليز زمان وبيتميز بالطابع المعمارى الاوروبي القديم
المساكن الخشبية بالبلاكونات الخشب والسقف
المثلثي فيها فيلات الهيئة اللى بتتميز بشجر الجوافة
والمانجه واللمون والطرق الفاضية بالرصف الاصفر فى ازرق ….
اللى من اسماعلية يعرف شارع البلاجات .. شارع السلطان حسين .. شارع محمد على. شارع سعد زغلول وشارع مصر .. لهواه الشوبينج.

يعنى نادى الاسماعيلي ونادى القناة ونادى الشهدا ونادى الكهربا ونادى الموانى ونادى التأديف والشراع…. شواطئ الفيروز والدانفا والفرنساوى وعثماسون والتعاون والملاحة والشبان قرى سياحية زى قرية 25 يناير وقرية النورس وغيرهم..

اسماعلية تاريخيا لا غبار عليها بداية من ايام الانجليز وحفر القناة وعرابي وديليسيبس مرورا بالعدوان الثلاثي والمقاومة الشعبية وختاما بحرب الاستنزاف ولحد نصر اكتوبر.

لو اتكلمنا عن اسماعلية عامة .. الاسماعلية المدينة عاصمة الاسماعلية المحافظة اللى بتشمل القنطرة شرق وغرب والفردان دول فى طريق بورسعيد .. شمالا وفايد وابو سلطان وابوعطوة فى طريق السويس .. جنوبا وابوصوير والقصاصين والتل الكبير فى طريق الزقازيق .. الطريق للغرب عامة والشرق المعدية اللى بتودى سينا.

دى كانت اسماعلية فى سطور .. عمرى ما هوفيها حقها فى وصف دقيق ليها
((شكرا لكم اصدقائى الأعزاء***دانيال البرزى***))

تعليق واحد

  1. ماهر عبد السيد

    نعم الحروف العامه فى كلماتكم عن الإسماعيلية
    تؤكد تأصلكم وحبكم لهذه المحافظة ، بل نابعه من القلب ساكنه فى قلب هذه المدينة الساحلية
    شكرًا لكم كلماتكم والى المزيد من الكتابه حول هذه المدينة الجميله باهلها الطيبين

اضف رد

لن يتم نشر البريد الإلكتروني . الحقول المطلوبة مشار لها بـ *

*

Shares