نزلت في بحرك الفضة

أتشاهد وأتوضي

وأطهر قلبي بالإيمان

وأبل الريق بكام أية

وكام سورة من القرآن..

عشان أصلي وأدعيلك

في ركعاتي وسجداتي

لقيت نور ملا روحي

وحُب كبير بينقلني

لعالم تاني

م الوجدان

وقفت للحظة أتأمل وأقول انا مين ؟؟؟

أنا في حُبك وصلت لفين ؟

أنا العاشق..

انا الولهان

أنا الناسك في محرابك

بقالي سنين على بابك

وإنت سايقة في دلالك

دا مهما كتروا خطابك

أنا وحدي إللي باقي لك

أنا باسهر أغنيلك

وأضوي لك قناديلك

وبادعي لك في ساعة الهجر

وركعاتي فى صلاة الفجر

يامصر..

.يامنصورة

يامذكورة

في القرآن أنا حُبك..

انا أملك انا المصري

وحُبي ليك شيء حصري

يا روح الروح يا أعلي م الكلام والبوح

يا إسم ع الجبين مكتوب

يا قدري..والقدر مكتوب

ومين يهرب من المكتوب

يا مصر يا منصورة

يا مذكورة في القرآن

Leave a Reply

Your email address will not be published.