( 1 ) خارجيا..
عشان نكون حقانيين لازم طبعا ننظر للنص المليان من الكوبايه و مش عايزين نشوف النص الفاضي بس و بناء عليه انا كنت سعيد جدا و فخور برؤيه اعلام بلدي و رموزها منورين في الداخل الفلسطيني و سعدت جدا بالمصالحه الداخليه الفلسطينيه و دي طبعا حاجه هتزعل اسرائيل خالص عشان بس الناس اللي هرت في قصه ابتسامه الريس مع نتنياهو في الامم المتحده احب اقولهم دي سياسه يا عم الحاج اذا كان المسؤلين الفلسطينيين انفسهم بياخدوهم حضن مطارات في اللقاءات الرسميه و حتي مسؤلي حماس بياخدوا الصوره معاهم بنفس الابتسامه و كمان نغمه مش دي حماس الشريره بتاعت فتح السجون اه فعلا هما هما و مش من 2011 بس لاااا دي حماس من 2005 و هي بتشتغل ضد مصر و امنها القومي علي طول الخط و ده كان احد اسباب الفجوه الكبيره اللي حصلت بين السلطه في قطاع غزه و الحكومه المصريه وقتها لكن يا عزيزي القاعده الاولي و الأساسيه في السياسه الخارجيه انه مهما اختلفت المصالح فقد تتلاقي في نقطه و احنا لينا مصلحه حاليه مع حماس في ضبط الحدود و اشياء اخري و ممكن يكون في مصالح مشتركه اخري في المستقبل اذا خلصت نواياهم كما ان احد القواعد الاخري الهامه في السياسه انه لا يوجد صديق ابدي و لا عدو ابدي بل توجد بين الدول مصالح مشتركه ده غير ان لسان حال مصر مع الحمساويه دائما يقول ” و ان عدتم عدنا ” ..!! ايه بقي وجه الاستغراب من موقف مصر الحالي من حماس احنا بنتجاوز عن اشياء في مقابل اشياء اخري اكبر و اهم.. و بالبلدي كده مصر بتسيب باقي الدول تهري في القضيه الفلسطينيه لحد ما تجيب اخرها و تعطل و تدخل هي في ثانيه تخلص الكلام.. عشان كده فعلا التحيه كل التحيه لرجال المخابرات العامه اللي بيتولوا هذا الملف منذ عقود بإقتدار شديد…

( 2 ) داخليا..
نيجي بقي للنص الفاضي للاسف..
تابعت بحزن تصريحات الحكومه مسؤلين و وزراء معنيين بعد اعلان التعداد السكاني لمصر و بعيدا عن انه في حاجات كنت منتظرها من هذا التعداد زي العدد النهائي للاخوه الاقباط في مصر مثلا و ده محصلش لكن مااااشي… نرجع بقي لتصريحات و رأي الساده المسؤلين اللي شافو في التعداد فرصه لمعايره الشعب بعدده و انه لازم الناس تبطل خلفه و ان عدد 100 و شويه مليون ده معوق للتنميه و هكذا..!!! مش عارف ليه ساعتها كل اللي جه في دماغي الهند و ماليزيا و اندونيسيا… البلاد دي طول عمرها عدد سكانها في الليمون و عمرهم ما شافو ان ده معوق للتنميه بالعكس شافوها ثروه يقدروا يستغلوها اذا اتوجهت صح لدرجه ان الهند علي لسان مسؤليها بتتباهي انها هتكون اكبر من الصين قبل عام 2050 و شافوها احد اهم عناصر قوه اي دوله و بالتالي الناس دي اشتغلت علي استغلال كل هذه الايدي العامله عشان يوصلوا للي هما فيه دلوقتي..!! الهند لسه فيها فقر اه صحيح و قفر مدقع كمان في بعض المناطق لكن في نفس الوقت اصبحت من اهم القوي الاقتصاديه و العسكريه و العلميه و الصناعيه في العالم و ده اكيد هيخليها تقدر تحل مشكله الفقر في وقت قريب لكن احنا طول ما شايفين ان مشكلتنا في عددنا بس و ان الناس كتير عمرنا ما هنحل حاجه لحد ما نقدر نستغل الناس الكتير دي لالاستغلال الامثل.. و احنا مش هنخترع يعني بالعكس ده احنا من الاخر كده هننقش اللي غيرنا عملوه و لا حتي التقليد مش هنعرف نعمله !!! هو احنا هنود و لا ايه ( كنا بنتريق زمان علي بعض بكلمه هنود واخدلي بالك انت ) ده النص الفاضي اللي كنت اتمني يكون مليان برضو عشان تبقي الكوبايه كامله..!!

Leave a Reply

Your email address will not be published.